ନୂଆଦିଲ୍ଲୀ,୦୬/୦୩; ଇରାନ କ୍ଲଷ୍ଟର ବମ୍ ମିସାଇଲରେ ଇସ୍ରାଏଲ ଉପରେ ଆକ୍ରମଣ କରୁଛି । ଏହାର ପରିଣାମ ଏତେ ଘାତକ ଯେ ଇସ୍ରାଏଲ ବି ଆତଙ୍କିତ । ଜନବସତି ଅଞ୍ଚଳରେ ଏହି ବୋମା ପଡୁଛି । ଇସ୍ରାଏଲ ନିଜେ ସୋସିଆଲ ମିଡିଆରେ ପୋଷ୍ଟ୍ କରି ଏହି ସୂଚନା ଦେଇଛି ଏବଂ ଏହା କେମିତି ଏତେ ବିପଦପୂର୍ଣ୍ଣ ହୋଇଛି, ତାହା ବି କହିଛି । ତେବେ ଏହି କ୍ଲଷ୍ଟର୍ ବମ୍ ମିସାଇଲ କ’ଣ? ଏ ଟେକ୍ନୋଲୋଜି କେମିତି କାମ କରେ? ଇରାନ ପାଖକୁ ଏହା ଆସିଲା କେମିତି ଏବଂ ଇସ୍ରାଏଲ ପାଇଁ ଏହା କେତେ ବଡ଼ ବିପଦ? କ୍ଲଷ୍ଟର ବମ୍ ମିସାଇଲ ଏକ ସ୍ୱତନ୍ତ୍ର ପ୍ରକାର ମିସାଇଲ । ଏହା ଭିତରେ ଗୋଟିଏ ବଡ଼ ୱାରହେଡ୍ ନ ଥାଏ, ବରଂ ଅନେକ ଛୋଟ ଛୋଟ ବୋମା ଭର୍ତ୍ତି ହୋଇଥାଏ । ଏହାକୁ ସବ୍ମ୍ୟୁନିଶନ୍ ବା ବମ୍ଲେଟ୍ କୁହାଯାଏ । ମିସାଇଲ ଲକ୍ଷ୍ୟ ନିକଟରେ ପହଞ୍ଚିଲେ, ଆକାଶରେ ଖୋଲିଯାଏ । ତା’ପରେ ଡଜନ୍ ଛୋଟ ଛୋଟ ବୋମା ଅଲଗା ଅଲଗା ଦିଗରେ ଖେଳିଯାଏ ଏବଂ ଭିନ୍ନ ଭିନ୍ନ ସ୍ଥାନରେ ପଡ଼ି ବିସ୍ଫୋରଣ କରେ । ଅର୍ଥାତ୍ ଗୋଟିଏ ମିସାଇଲ ଏକସଙ୍ଗେ ଅନେକ ସ୍ଥାନରେ ବିସ୍ଫୋରଣ କରିପାରେ । ସେଥିପାଇଁ ଏହାକୁ ଅତ୍ୟନ୍ତ ବିପଦପୂର୍ଣ୍ଣ କୁହାଯାଏ । ସାଧାରଣ ମିସାଇଲ ଗୋଟିଏ ୱାର୍ହେଡ୍ ନେଇ ଯାଏ । ତାହା ଗୋଟିଏ ସ୍ଥାନରେ ପଡ଼ିଲେ, ବଡ଼ ଧରଣର ବିସ୍ଫୋରଣ ହୁଏ । କ୍ଲଷ୍ଟର କିନ୍ତୁ ବାୟୁରେ ଏକ ନିଶ୍ଚିତ ଉଚ୍ଚତାରେ ଖୋଲିଯାଏ । ତା’ ଭିତରୁ ଅନେକ ଛୋଟ ବୋମା ବାହାରେ । ଏଗୁଡ଼ିକ କିଛି କିମି କ୍ଷେତ୍ରରେ ଖେଳିଯାଏ । ପ୍ରତ୍ୟେକ ବୋମା ଭିନ୍ନ ଭିନ୍ନ ସ୍ଥାନରେ ବିସ୍ଫୋରଣ କରେ । ଯୁଦ୍ଧରେ ଏହା ଶତ୍ରୁର ବଡ଼ କ୍ଷେତ୍ରକୁ ଧ୍ୱସ୍ତ କରିପାରେ, ଯାହା ଇରାନ ଏବେ ଇସ୍ରାଏଲ ବିରୋଧରେ ପ୍ରୟୋଗ କରୁଛି ।
About the Author
