ନୂଆଦିଲ୍ଲୀ: ଇକବାଲ ମଞ୍ଚର ଉସମାନ ହାଦୀଙ୍କ ହତ୍ୟା ପରେ ବାଂଲାଦେଶର ପରିସ୍ଥିତି ଉତ୍ତେଜନାପୂର୍ଣ୍ଣ ରହିଛି । ପଡ଼ୋଶୀ ଦେଶର ବିଭିନ୍ନ ସ୍ଥାନରୁ ହିଂସାର ରିପୋର୍ଟ ଆସିଛି । ଏହି ସମୟରେ, ଭାରତ ଏବଂ ବାଂଲାଦେଶ ମଧ୍ୟରେ ସମ୍ପର୍କ ମଧ୍ୟ ଏକ କଷ୍ଟକର ପର୍ଯ୍ୟାୟ ଦେଇ ଗତି କରୁଛି । ସମ୍ପ୍ରତି, ବାଂଲାଦେଶ ଭାରତକୁ ଭିସା ସେବା ବନ୍ଦ କରିବାକୁ ନିଷ୍ପତ୍ତି ନେଇଛି । ଭାରତ ପୂର୍ବରୁ ଏହି ପଦକ୍ଷେପ ନେଇ ସାରିଛି । ଭାରତ ଏବଂ ବାଂଲାଦେଶ ମଧ୍ୟରେ ଖରାପ ହେଉଥିବା ସମ୍ପର୍କ ମଧ୍ୟରେ, ରୁଷ ଏଣ୍ଟ୍ରୀ କରିଛି । ଢାକାରେ ରୁଷ ରାଷ୍ଟ୍ରଦୂତ ଉଭୟ ଦେଶକୁ ଉତ୍ତେଜନା ହ୍ରାସ କରିବାକୁ ଅପିଲ୍ କରିଛନ୍ତି । ବାଂଲାଦେଶକୁ ୧୯୭୧ ମସିହାର କଥା ମଧ୍ୟ ମନେ ପକାଇ ଦେଇଛି ରୁଷ୍ । ସମ୍ପ୍ରତି, ଭାରତ ବିରୋଧୀ ଏବଂ ଶେଖ ହସିନା ସରକାର ବିରୋଧୀ ନେତା ଉସମାନ ହାଦୀଙ୍କୁ ବାଂଲାଦେଶରେ ଗୁଳି କରାଯାଇଥିଲା । ସିଙ୍ଗାପୁରର ଏକ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ହାଦୀଙ୍କ ମୃତ୍ୟୁ ହୋଇଥିଲା । ଯାହା ଫଳରେ ବାଂଲାଦେଶରେ ହିଂସା ସୃଷ୍ଟି ହୋଇଛି । ଭାରତ ଏବଂ ବାଂଲାଦେଶ ମଧ୍ୟରେ ସମ୍ପର୍କ ଆହୁରି ତିକ୍ତ ହୋଇଛି । ଜଣେ ରୁଷୀୟ ରାଷ୍ଟ୍ରଦୂତ ଏବେ ଭାରତ-ବାଂଲାଦେଶ ସମ୍ପର୍କ ଉପରେ ଗୁରୁତ୍ୱାରୋପ କରିଛନ୍ତି । ଢାକାରେ ଅବସ୍ଥାପିତ ରୁଷୀୟ ରାଷ୍ଟ୍ରଦୂତ ଆଲେକଜାଣ୍ଡାର ଗ୍ରିଗୋରିଭିଚ୍ ଖୋଜିନ୍ ଉଭୟ ଦେଶକୁ ଉତ୍ତେଜନା ହ୍ରାସ କରିବାକୁ ଅନୁରୋଧ କରିଛନ୍ତି । ସେ କହିଛନ୍ତି ଯେ ସମଗ୍ର ଅଞ୍ଚଳରେ ଶାନ୍ତି ଏବଂ ସ୍ଥିରତା ପାଇଁ ଭାରତ ଏବଂ ବାଂଲାଦେଶ ମଧ୍ୟରେ ଭଲ ସମ୍ପର୍କ ଅତ୍ୟାବଶ୍ୟକ । ଭାରତ ଏବଂ ବାଂଲାଦେଶ ମଧ୍ୟରେ ଉତ୍ତେଜନା ହ୍ରାସ କରାଯିବା ଉଚିତ୍ । ୧୯୭୧ ମସିହାରେ ବାଂଲାଦେଶର ସ୍ୱାଧୀନତାରେ ଭାରତ ପ୍ରମୁଖ ଭୂମିକା ଗ୍ରହଣ କରିଥିଲା ଏବଂ ରୁଷ ମଧ୍ୟ ଏହାକୁ ସମର୍ଥନ କରିଥିଲା । ଭାରତ, ବାଂଲାଦେଶ ଏବଂ ରୁଷ୍ ସର୍ବଦା କାନ୍ଧକୁ କାନ୍ଧ ମିଶାଇ କାମ କରିଛନ୍ତି । ବର୍ତ୍ତମାନର ପରିସ୍ଥିତିରେ, ଉତ୍ତେଜନାକୁ ଆହୁରି ବୃଦ୍ଧି କରିବା ଅନୁଚିତ ହେବ ବୋଲି କହିଛି ରୁଷ୍ । ଜଳୁଛି ବାଂଲାଦେଶ- ଗତ ୧୮ ତାରିଖରେ ଭାରତ ବିରୋଧୀ ତଥା ପୂର୍ବତନ ବାଂଲାଦେଶ ପ୍ରଧାନମନ୍ତ୍ରୀ ଶେଖ୍ ହସିନାଙ୍କ ବିରୋଧୀ ଛାତ୍ରନେତା ଉସମାନ ହାଦୀର ମୃତ୍ୟୁକୁ ନେଇ ବାଂଲାଦେଶରେ ନିଆଁ କୁହୁଳିଥିଲା । ଧିରେ ଧିରେ ଏହା ତୀବ୍ର ହେବାରେ ଲାଗିଲା । ଭାଙ୍ଗାରୁଜା, ପୋଡାଜଳା ସ୍ଥିତି ବିସ୍ଫୋରକ ହେବାରେ ଲାଗିଲା । ଭାରତ ବିରୋଧୀ ନାରା ବାଜି ହୋଇଥିଲା । ସେହି ସମୟରେ ୨୭ ବର୍ଷୀୟ ଦୀପୁ ଚନ୍ଦ୍ର କାମ କରୁଥିବା ଫ୍ୟାକ୍ଟ୍ରିରେ କିଛି ଶ୍ରମିକ ହଙ୍ଗାମା କରିବା ଆରମ୍ଭ କଲେ । ଦୀପୁ ଧର୍ମୀୟ ଭାବନାକୁ ଅପମାନିତ କରିଥିବା ମିଛ ଆରୋପ ଲଗାଇ ପାଟିତୁଣ୍ଡ କରିଥିଲେ । ଏହି ଖବର ବ୍ୟାପିବା ପରେ ଫ୍ୟାକ୍ଟ୍ରି ସାମ୍ନାରେ ଆସି ରୁଣ୍ଡ ହୋଇଯାଇଥିଲେ ଶହ ଶହ ଉତ୍ୟକ୍ତ ପ୍ରଦର୍ଶନକାରୀ । ସେମାନେ ଫ୍ୟାକ୍ଟିରୁ ଦୀପୁଙ୍କୁ ଘୋଷଡି ନେଇ ନିସ୍ତୁକ ଭାବରେ ପିଟି ପିଟି ମାରି ଦେଇଥିଲେ । ସେତିକିରେ ତାଙ୍କ ମନ ଶାନ୍ତି ହୋଇନଥିଲା ଯେ ଗଛରେ ଟାଙ୍ଗି ନିଆଁ ଲଗାଇ ଦେଇଥିଲେ । ବାଂଲାଦେଶର ମୈମନସିଂରେ ଏକ ଗୋଷ୍ଠୀ ଦ୍ୱାରା ହିନ୍ଦୁ ଯୁବକ ଦୀପୁ ଚନ୍ଦ୍ର ଦାସଙ୍କୁ ପିଟିପିଟି ହତ୍ୟା କରାଯିବା ଘଟଣା ମଧ୍ୟ ଉତ୍ତେଜନା ସୃଷ୍ଟି କରିଛି । ଆଜି ବାଂଲାଦେଶରେ ସଂଖ୍ୟାଲଘୁ ହିନ୍ଦୁଙ୍କ ଉପରେ ହେଉଥିବା ଅତ୍ୟାଚାର ବିରୋଧରେ ହିନ୍ଦୁ ସଂଗଠନଗୁଡ଼ିକ ଦିଲ୍ଲୀରେ ପ୍ରତିବାଦ କରିଛନ୍ତି । ଏହାର ଜବାବରେ ପୁଲିସ ଫୋର୍ସ ମୁତୟନ କରାଯାଇଛି ଏବଂ ଭାରୀ ବ୍ୟାରିକେଡ୍ ନିର୍ମାଣ କରାଯାଇଛି ।
About the Author
