ନୂଆଦିଲ୍ଲୀ: ବଢ଼ିବ ଭାରତୀୟ ବାୟୁସେନାର ଶକ୍ତି । ୮୦ଟି ପରିବହନ ବିମାନ କିଣିବ ପ୍ରତିରକ୍ଷା ମନ୍ତ୍ରଣାଳୟ। ଏନେଇ ବିଶ୍ୱସ୍ତରରେ ତିନୋଟି ଦେଶର ପ୍ରମୁଖ ବିମାନ ନିର୍ମାତାଙ୍କ ମଧ୍ୟରେ ପ୍ରତିଯୋଗିତା ଦେଖିବାକୁ ମିଳିପାରେ।ଚଳିତ ବର୍ଷ ଡିସେମ୍ବର ଶେଷ ସୁଦ୍ଧା ପ୍ରତିରକ୍ଷା ଅଧିଗ୍ରହଣ ପରିଷଦ ପକ୍ଷରୁ ୮୦ଟି ମଧ୍ୟମ ପରିବହନ ବିମାନ କ୍ରୟକୁ ଅନୁମୋଦନ ମିଳିପରେ। ଏଥିସହିତ ଆସନ୍ତା ବର୍ଷ ଜାନୁଆରୀରେ କ୍ରୟ ପ୍ରକ୍ରିୟା ଆରମ୍ଭ କରି ଟେଣ୍ଡର ଜାରି କରାଯାଇପାରେ। ଭାରତୀୟ ବାୟୁସେନାକୁ ନିଜର ବିମାନ ବିକ୍ରୟ କରିବା ପାଇଁ, ଆମେରିକୀୟ କମ୍ପାନୀ ଲକହିଡ୍ ମାର୍ଟିନ୍ ଏହାର ସି-୧୩୦ଜେ ସୁପର ହର୍କ୍ୟୁଲେସ୍, ବ୍ରାଜିଲ କମ୍ପାନୀ ଏମ୍ବ୍ରାର ନିଜର କେସି-୩୯୦ ମିଲେନିୟମ୍ ବିମାନ ଏବଂ ୟୁରୋପୀୟ କମ୍ପାନୀ ଏୟାରବସ୍ ଡିଫେନ୍ସ ଆଣ୍ଡ୍ ସ୍ପେସ୍ ନିଜର ଏ-୪୦୦ଏମ ବିମାନର ପ୍ରସ୍ତାବ ରଖିବେ । ଭାରତୀୟ ବାୟୁସେନା ଏହାର ବର୍ଦ୍ଧିତ ବିମାନ ପରିବହନ ଆବଶ୍ୟକତା ପୂରଣ କରିବା ପାଇଁ ୧୮ ରୁ ୩୦ ଟନ୍ କାର୍ଗୋ କ୍ଷମତା ବିଶିଷ୍ଟ ନୂତନ ପରିବହନ ବିମାନ ଖୋଜୁଛି। ଆମେରିକୀୟ କମ୍ପାନୀ ଲକହିଡ୍ ମାର୍ଟିନ୍ ଟାଟା ଆଡଭାନ୍ସଡ୍ ସିଷ୍ଟମ୍ସ ଲିମିଟେଡ୍ ସହିତ ସହଯୋଗରେ ଏହି ଟେଣ୍ଡର ପାଇଁ ବିଡ୍ କରିଛି। ଏୟାରବସ୍ ଏପର୍ଯ୍ୟନ୍ତ ଆନୁଷ୍ଠାନିକ ଭାବରେ ଏହାର ଅଂଶଗ୍ରହଣ ଘୋଷଣା କରିନାହିଁ। ଏୟାରବସ୍,TASL ସହିତ ସହଯୋଗରେ, ବାୟୁସେନା ପାଇଁ ୫୬ଟି ସି-୨୯୫ ବିମାନକୁ ଆଧୁନିକୀକରଣ କରିବା ପାଇଁ ୨୧,୯୩୫ କୋଟି ଟଙ୍କାର ଏକ ପ୍ରକଳ୍ପ ଉପରେ କାମ କରୁଛି।
About the Author
